Kirste Paltto lea vuosttas sámi nissongirječálli. Su vuosttas girji Soakŋu (noveallačoakkáldat) almmustuvai 1971. Son lea čállán 19 girjji. Diktačoakkáldagaid, mánáidgirjjiid, románaid ja noveallačoakkáldagaid lassin son lea čállán teahterčájálmasaid ja radiogulddalmasaid sihke sáme- ja suomagillii. Máŋggat su divttat ja noveallat leat jorgaluvvon eará gielaide. Muhtin su románat leat jorgaluvvon suoma- ja tuiskkagillii. Su mánáidgirji Vilges geađgi (1980) almmustuvvá eaŋgalsgillii 2009.
Paltto lea ožžon máŋga bálkášumi sihke su girjjiid ja eará kulturbarggu ovddas. Son lei mielde vuođđudeamen Sámi girječálliid searvvi 1979 ja doaimmai searvvi vuosttas sátnejođiheaddjin gitta 1986 rádjái. Son vuođđudii Gielas-goasttidansearvvi 1989 ja doaimmai máŋga jagi dan jođiheaddjin. Son lea maiddái doaibman Rávgoš-teahtera jođiheaddjin.
Čállima lassin Paltto lea čeahpes dáiddár ja duojár.
Paltto lea riegádan Vuovdaguoikkas, Badje-Deanus Suoma bealde. Dál son orru Ohcejogas.
1 Comment
Hei Kirste! Hui fiinna ruoktosiiddut dus! Olu lihku, dushan lei ikte riegadanbeaivi. Mo avvudit dan?
D. Minna